• १२ मंसिर २०७७, शुक्रबार
विश्वकपको डेब्युमै अर्जेन्टिना प्रतिस्पर्धी, उत्साहित छौं
  • स्टुडियाे संवाददाता

आइसल्याण्डले गएको वर्ष भएको युरोकप फुटबलमा उत्कृष्ट प्रदर्शन गर्दै विश्व फुबलमा चासो राख्ने सबैलाई चकित पारेको थियो । युरोकपमा आफ्नो जादु देखाउँदै अन्तिम ८ सम्म पुगेको आइसल्याण्डले आउँदो वर्ष रुसमा हुने विश्वकप फुटबलमा स्थान बनाएर अर्को इतिहास बनाएको छ ।

पहिलो पटक विश्वकप खेल्न थालेको आइसल्याण्ड शुक्रबार मस्कोमा भएको ड्र अनुसार दुईपटकको विश्व विजेता अर्जेन्टिना रहेको टिममा परेको छ । समूह ‘डी’ मा आइसल्याण्डसँगै विश्व फुटबलमा यो समयका उत्कृष्ट खेलाडी लियोनल मेस्सीको टिम अर्जेन्टिना, क्रोएसिया र नाइजेरिया छन् ।

विश्वकपमा डेब्यु गरेको आइसल्याण्डले पुरोनो र बलियो टिम अर्जेन्टिनासँग आउँदो जुन १६ मा मस्कोमा खेल्ने छ । आइसल्याण्डका प्रशिक्षक हेइमिर हालग्रिमसनले दुईपटकको विजेता अर्जेन्टिनासँगको खेलका लागि आफूहरु प्रतिक्षारत रहेको बताएका छन् । ‘विश्वकप फुटबलका बारेमा सोच्ने बित्तिकै सबैले अर्जेन्टिना र ब्राजिलका बारेमा जरुर सोच्छन् ।’ प्रशिक्षक हालग्रिमसनले भने ‘त्यसमा पनि हाम्रो विश्वकपको डेब्यु खेलमा अर्जेन्टिनासँग खेल्न पाउनु भाग्यको रुपमा लिन्छु, हामी त यसका लागि उत्साहित र रोमाञ्चित छौं ।’ तर यो खेल निकै कठिन हुने पक्का रहेको उनले बताए ।

विश्वकपमा छनौट हुने कम जनसंख्या भएको देश आइसल्याण्डले समूह चरणको दोस्रो खेलमा अफ्रिकी देश नाइजेरियासँग २२ जुन तथा समूहको अन्तिम खेलमा युरोपको क्रोएसियासँग खेल्नेछ ।

क्रोएसियाका बारेमा आफूहरुलाई धेरै थाहा भए पनि नाइजेरियाका बारेमा कम रहेको प्रशिक्षक हालग्रिमसनले बताए । तर नाइजेरियाको इतिहास थाहा रहेकाले आफूहरु अघि बढ्ने लक्ष्यका साथ खेल्ने उनको भनाई छ ।

  • १६ मंसिर २०७४, शनिबार प्रकाशित
  • नेपाली स्टुडियाेमा प्रकाशित कुनै समाचारमा तपाईंको गुनासो भए हामीलाई mail.nepalistudio@gmail.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकट्विटरमा पनि जोडिन सक्नुहुन्छ ।

    Nabintech