ताप्लेजुङमा ६ जनामा डेङ्गी सङ्क्रमण
ताप्लेजुङमा ६ जनामा डेङ्गी सङ्क्रमण

स्टुडियाे डेस्क

  • १७ श्रावण २०८०, बुधबार प्रकाशित
  • हिमाली जिल्ला ताप्लेजुङमा डेङ्गी सङ्क्रमण देखिएकाे छ । शङ्कास्पद बिरामीको स्वास्थ्य परीक्षणका क्रममा छ जनामा डेङ्गी सङ्क्रमण पुष्टि भएको जिल्ला अस्पताल ताप्लेजुङका मेडिकल सुपरिन्टेनडेन्ट डाक्टर ओमप्रकाश थापा मगरले जानकारी दिनुभयो ।

    उहाँका अनुसार सङ्क्रमण पुष्टि भएकामध्ये जिल्ला अस्पतालमा उपचारपछि पाँच जना घरमै स्वास्थ्य लाभ गरिरहेका छन् । एक जना ८० वर्षीय वृद्धकाे भने अस्पतालमा उपचार भइरहेकाे डा. थापामगरले जानकारी दिनुभयो ।

    जिल्ला अस्पतालका अनुसार धरान, विराटनगर र झापाबाट ताप्लेजुङ आएकाहरूमा डेङ्गी सङ्क्रमण पुष्टि भएको हो । कोही तराईतिर रहँदै सङ्क्रमित भएर आएका र केहीमा पछि डेङ्गी सङ्क्रमण देखिएको पाइएको अस्पतालले जनाएको छ । हिमाली जिल्लामा समेत डेङ्गी सङ्क्रमित फेला पर्नु सामान्य नभएको डा. थापा मगरको भनाइ छ ।

    फुङलिङ नगरपालिका–६ का ८६ वर्षीय कृष्णप्रसाद आचार्यलाई लामखुट्टे भन्ने अहिलेसम्म थाहा थिएन । अहिले लामखुट्टेले सुत्नै दिन छाडेको उहाँले गुनासाे गर्नुभयाे ।

    डेङ्गी एडिस एजिप्टाई जातको पोथी लामखुट्टेको टोकाइबाट सर्छ । एक्कासी ज्वरो आउने, थकान महसुस हुने, टाउको, माङ्सपेसी तथा जोर्नी दुख्ने, वाकवाकी लाग्ने वा वान्ता हुने आदि यसका प्रमुख लक्षणहरू हुन् । लामखुट्टेको टोकाइबाट बच्न पूरा शरीर ढाक्ने कपडा लगाउने, खाल्डाखुल्डी पुर्ने, खानेपानी वा ढल चुहिएको छ भने तत्काल मर्मत गर्ने, खाली भाँडाकुाडा घोप्ट्याएर राख्ने, पानीको ट्याङ्की पूरै खाली गरेर सफा गरिरहने, सुत्ने बेला झुलको प्रयोग गर्नुपर्छ ।

    सम्बन्धित
    Home TV Menu Trend Recent

    ताजा समाचार

    धेरै पढिएको